A B C D E F G H I J K L M N O P Q R S T U V W X Y Z #

Tema: Poezi Për Ëndrra dhe Shpresë

Më Thuaj Xhames Xhois

(Një bisedë pa zë me James Joyce në ditëlindjen e tij)
Nga Fatmir Terziu

Më thuaj Xhames Xhois* si ta njoh qytetin tim,
më dhemb në shpirt,
e gjej në heshtjen tënde e lexoj me mend
por kjo më tremb,
më thuaj të lutem një zgjidhje,
të gjej mes poezisë këtë lidhje.

Në vargun tënd del serbes
një shpirt i zi si pija tipike “Guinness”
një pijanec lan fytyrën me ujin e ndotur;
një wordsmith lëviz i ndrojtur,
një magjistar dhe një zjarrndezës,
një lypsar me hundë të ftohur,
i merr ti dhe pa frikë u jep shije metafore,
por aty s’ka bukë me lista në fletore.

E di që ka dhe zonja me peliçe
bartës plot mendjelehtësi që u krekosen me salçiçe,
anëtarë të shëndoshë që zgjidhen me mend
e ti i ul si kriça në Parlament
me të mësuarit e tyre e di që s’ke hall
por në qytetin tim kjo është plagë.

Më thuaj si t’ja zbus dhimbjen atje në Shkumbin
më jep një fjalë nga fjalët e tua në Dublin...


James Joyce, lindi më 2 Shkurt 1882. Është novelist dhe poet irlandez i njohur për “Uliksin”.

- poem written by Fatmir Terziu


Choose star rating

Rating:  5 / Votes cast:  1





Kjo faqe përdor cookies vetëm për reklama dhe statistika. Kjo faqe nuk mbledh, nuk përdor dhe nuk shpërndan të dhënat tuaja. Kompanitë e palëve të treta që përdorin cookies janë: Google, Taboola dhe MGID.
Më shumë info  
teksteshqip.com © 2007 - 2019