A do ta gjejmë diku kroin e flladit
Që t’i qetësojmë valët përvëluese
Kur t’na rrok malli i vetvetes

Kohë a do të kemi
Që t’i arnojmë ëndrrat e përgjumshme
Para se t’na bluajnë kokërr për kokërr

Në dasmën e harresës sonë
A do t’i kemi aq krushq
Sa t’i kapërcejmë edhe muret e legjendave

E nostalgjitë e kohëve të veta
A do t’i kullotë kush
Në livadhin e pakositur të kujtimeve tona