"Për mua je kryevepër" është albumi i radhës i këngëtares së mirënjohur Remzie Osmani, e cila ndihet mjaft e kënaqur me këtë album.

Remzia në këtë album, i cili përmban nëntë këngë ka bashkëpunuar me Ilir Beranin, Edi Balilin, Virusin, Enver Ibrahimin, Armand Trebicka, Avni Qaili, Agron Jashari etj..

"Mendoj se kam sjellë një album të mirë për adhuruesit e mi, të gjitha këngët e albumit përçojnë një mesazh të caktuar te publiku. Dhe besoj që edhe adhuruesit janë duke e pëlqyer", ka thënë ajo për "Zëri".

Këngët të gjitha kanë një motiv të caktuar, ku në një pjesë të tyre i këndohet dashurisë. Ndërsa sa i përket zhanrit thuajse të gjitha janë me zhanër popullor. Remzia përveç albumit ka lansuar edhe videoklipin e këngës "Çikat e kurbetit".

Ajo na bën të ditur se gjatë këtij viti do të lansojë edhe disa këngë e klipe të reja.