>
LETERSISHQIP

Beqir Limanit

Moj Kërçovë, kala kreshnike,
Vatra jonë heroike,
Ke rritë trima për t`luftuar,
Brez pas brezi janë trashëguar!

Si n`çdo fshat, dhe n`Kollarë,
Ka shumë burra atdhetarë!
Për ta dëgjoi krejt Ballkani,
Midis tyre dhe Beqir Limani!...

Burr i matur mustaqe zi,
S`trembej kurrë syri i tij!
Ishte i drejtë dhe besnik,
Ishte i dashur, si shok dhe mik!...

I rrallë ishte si artist -
Ishte mjeshtër instrumentalist!
Këtij trimi dhe burrë mali,
Mirë i rrinte n`buzë kavalli!...

Ishte njeri shumë patriot,
Atëdheut thoshte - t`i dalim zot,
Është i gatshëm Baca Beqë,
Ardhmëria t`mos hjeki keq!

Beqiri ishte një burrë trim,
E dua t`lirë thoshte - kombin tim,
Por, liria nuk dhurohet,
Për të duhet të luftohet!

T`mos na marrin nëpër këmbë,
I armatosur deri n`dhëmbë!
U bë pjestar i LPK -së.
Më vonë ushtar i UCK -së!

Baca Beqë zemër çelik,
Therrë ndër sy për çdo armik!
Mbante nofkën Lirim Uka,
Ai nuk dinte se ç`është tuta!

Ish pushteti komunist,
E burgos këtë aktivist,
Gjatë burgimit e torturuan,
Por, mendjen nuk ia ndryshuan!

Gjithë sekret që i ka fshehur,
Beqës kurrë nuk ia kanë gjetur!
Ishte i aftë dhe guximtar,
Lum që e pat kombi shqiptarë!

Në Kërçovë, në jug - lindje,
Ndërtoi shtëpinë për familje,
Oborri saj, u bë fushë beteje!
Me pretekst, kinse pa leje!

Në shtator, më tetëmbëdhjetë,
Të vitit nëntëdhjetë e tetë,
Rreth e rrotull shtëpisë,
Forca t`mëdha të policisë!

Urdhëruan Beqën të dorzohet,
Por, urdhëri tyre nuk zbatohet!
Para popullit tha - s`turpërohem,
Kurrë i gjallë nuk dorzohem!...

Mbi tri orë dyluftim,
Një familje, me një shtet rrethim!
Krisën rafalet nga t`katër anët!
Por, s`dorzohen dot Limanët!

Dy plumba t`zi ishin të kobshëm,
Qëlluan atdhetarin e devotshëm!
Në prag t`shtëpis të këtij martiri,
Heroikisht ra Bacë Beqiri!

Ky atdhetar i pa epur,
Ndërroi jetë për t`mos vdekur!
U shua jeta e një shprese,
Do t`mbesë simbol qëndrese!...

Plumbi i zi që i ra në krahërorë,
Beqir Limanin e bëri dëshmorë,
E bëri legjendë që s`do t`harrohet,
Brez pas brezi do t`kujtohet!...

Prej nesh Beqa kur është ndarë,
Ishte katërdhjetë e shtatë vjeçar,
Flijoi jetën për hirë t`lirisë,
Do t`shkruhet n`faqet e historisë!...

N`tokë t`Uskanës ku je i shtrirë,
Baca Beqë, pusho i lirë,
Të qoftë i lehtë dheu i Uskanës -
Të qoftë hallall qumshti i nënës!...

Kërçovë, më 11 tetor 2015