Kënga është kompozuar nga vetë artisti, tekstin e mori përsipër Teodor Laço, ndërsa orkestrimin e punoi Vangjush Vinjau. Në mesin e viteve 1960 dhe pas suksesit të përurimit të Festivalit të Këngës në Radio dhe Televizion në vitin 1962 në Tiranë, festivale të të ngjashme mbinë si kërpudha në çdo qytet të madh dhe jo vetëm. Një nga festivalet më të mëdha të qyteteve ishte ai i Korçës, i cili zakonisht mbahej gjatë muajve të parë të vitit, këngët e të cilit ishin shumë të suksesshme në të gjithë Shqipërinë. Në festivalin e dytë të vitit 1965, Ilia Vinjau mori pjesë për herë të parë, duke interpretuar një nga hitet më të mëdha të të gjitha kohërave, një këngë që ai shkroi për gruan e tij, gjeologen Pandora, me të cilën u martua dhe patën tre fëmijë. Kënga kapërceu çdo limit duke i dhënë atij vendin e dytë dhe duke e vendosur këngëautorin e ri në rangun e këngëtarëve të kohës.