Ngjyrë e kuqe si e zjarrit,
dhe shqiponja me dy krerë,
i qendisur me fije t'arit,
gjerë e gjatë e i bukur prerë.

Qindra vjet të patën shkuar
n'ditë të zeza e plot me zi,
por ty fama s'të është shuar,
ndonëse u trete u bëre hi.

Por ty fama s'të është shuar,
ndonëse u trete u bëre hi.

ref.
Hej hejj
Si shqiponjë krahë-gjerë,
që mbi male kur flutron,
hija jote është e bërë,
shpresë e kombit kur valon.

Bashkë me ty djalëria,
me dëshirë e me shpresë,
do t'luftojnë që Shqipëria,
t'rrojë gjithmonë e të mos vdesë.

Besa jonë është flamuri,
shenjë e lartë - gjithçka për ne,
themel kombit ai i vuri,
duke lindur ditën e re.

Atje lartë e ka shkrojtur,
dorë e Zotit që urdhëron;
se ne kemi për të rrojtur,
kombi ynë nuk perëndon.

Se ne kemi për të rrojtur,
kombi ynë nuk perëndon.

ref.
Hej hejj
Si shqiponjë krahë-gjerë,
që mbi male kur flutron.
Hija jote është e bërë,
Shpresë e kombit kur valon.

Bashkë me ty djalëria,
Me dëshirë e me shpresë,
Do t'luftojnë që Shqipëria,
t'rrojë gjithmonë e të mos vdesë.