Unë do të kem nevojë për ty
në ditët e dimrit,
kur shiu bie pareshtur
e pikat ngjasojnë me lotët
që rrjedhin nga shpirti im.

Do kem nevojë netëve të gjata,
kur flokët e dëborës në heshtje
do të puthin tokën
si mijëra telegrame që mbërrijnë
nga një tjetër botë.

Dhe atëherë, kur të jem e gëzuar,
se lumturia e trishtimi janë pranë,
nuk i ndan asnjë hap,
gazi shndërrohet në melankoli
në një çast.

Do të kem gjithnjë nevojë,
ndaj të lutem...
kujdesu për veten!
Do të kem gjithnjë nevojë,
ndaj të lutem...
kujdesu për veten!