Që në Prevezë e në Vlorë,
ç’u mbush deti me pamporë.
Një pasha me tre taborë
dolli në Sarandë e Vlorë.

Mynafikët vijnë e shkojnë
në Stamboll kartrat dërgojnë.
Në to sulltanit i thonë
se shqiptarët nuk pranojnë
t’i thonë sulltanit "lepe!"
s’japin nizamë e xhelepe.

Nizamë e xhelepe s’ka
është vendi fukara,
jetojnë me lakëra,
katër shtëpi me një ka,
si rrallë ka në dunja!
në muslimanë e raja!

Gryka e maleve gjëmojnë,
uxhum bënë tre taborrë.
Po me kë vallë luftojnë?
Me Gjolekë Kuçin thonë.

Gjolekë e Hodo Aliu,
në dorë palla ç’u ngriu
Tafil Buz mustaqeziu,
nga Grykë e Kuçit arriu.

Këta djemtë e Kurveleshit,
me pallë luftojnë sheshit.
Kurveleshi gur i thatë
me pallë luftojnë gratë.

O halldup shallvaregjerë,
në ta zënça dot guberë
do ta bëj si tjetër herë:
të çirresh ferrë më ferrë,
si litar tij për të vjerrë
në pyje degë më degë.