Prof. Migena Arllati është poete, studiuese, publiciste. Është e lindur në Elbasan / Shqipëri më 06.09.1974, në një familje me tradita qytetare dhe arsimdashëse. Familjet e të dy prindërve të saj nga Elbasani, për shkak të titujve të fisnikërisë si pronarë tokash dhe intelektualë të arsimuar, nuk u panë aspak me sy të mirë nga regjimi 50 – vjeҫar monist, duke përjetuar raste burgosjesh politike, përjashtimesh nga puna për shkak të biografisë së “dyshimtë”, konfiskime pronash, ndalime të së drejtës për studime etj. Arllati jeton në qytetin e Gjakovës në Kosovë prej 30 vjetësh me bashkëshortin Behar dhe katër fëmijët.
Studimet e larta i kreu në Fakultetin Filologjik, dega gjuhë – letërsi.
Diplomoi për diplomaci në Akademinë Diplomatike Shqiptare në Tiranë.
Ka përfunduar studimet pasuniversitare Master për Gjuhësi në Qendrën Shtetërore të Studimeve Albanologjike në Tiranë. Ёshtë PhD – Doktore e Shkencës në Filologji, Fakulteti i gjuhëve, i letërsisë dhe i komunikimit në Universitetin e Evropës Juglindore (UEJL). Aktualisht është profesoreshë e gjuhës shqipe dhe letërsisë. Ligjëruese në Universitetin Publik “Fehmi Agani” në Gjakovë. Është redaktore dhe recensente e mbi 200 vëllimeve me poezi e prozë të autorëve shqiptarë e të huaj. Ka botuar 15 (pesëmbëdhjetë) libra autorialë, kryesisht me poezi, studime gjuhësore, vështrime letrare, si dhe Leksikonin e Letërsisë shqipe për fëmijë e të rinj. Është fituese e dhjetëra çmimeve kombëtare dhe ndërkombëtare në fushën e letërsisë.

---