Në muzeun historik
Nji herë shkova me nji mik
Me bylbylin kangatar
Dervish Shaqën kosovar

Ja koburja e Boletinit
Veshë me serm e grykë t’florinit
Paska ardhë këtu n’Tiranë
Pranë herojve të tokës nanë

Krejt në zemren e atdheut
Afër shpatës s‘Skënderbeut
Me t’lavdishmit bijë e bija
Lum i thellë rrjedh historia

N’Mitrovicën e Kosovës
Ka dalë fjala e Knjaz Nikollës
Isa Begun me ma gjetë
Me ardhë mik more, i natë t'e vetë

E ka pritë e e ka gostitë
E ka mbajtë nji natë e i ditë
I pabesi s’njeh tradita
Ia ka mbushë rrugët me prita

Me bukëpremin pushkë ka nisë
Çan rrethimin baca Isë
Tu ia qitë timin Cetinës
S’lidhen agajt e Judbinës

E kanë rrah me t’egër telin
N’Podgoricë japin haberin
N’kamë me u çue sa ma parë
Me kapë prijësin kosovar

N’ballë të urës së Ribnicës
Ka dalë trimi i Mitrovicës
Me dy djemtë e vetë sokola
Vet i treti nga Kosova

Si azgana shtat namli
Hije i kanë bacës përbri
Me qeleshe bardh si bora
Mbi allti gati u rrin dora

Veshoviçi e ka nalë
Nal Isa se i kam dy fjalë
Armët e brezit me i dorzue
Veshoviç more ç’je ka thue

A e din me ke po flet
S’m’i ka marrë as krajl as mret
Për trimni mos t’kofsha falë
Armët për mu janë babë e djalë

Nantë sokolat ranë si plluma
Xhamadanin thurë me pluma
Tanë Kosova e dha kushtrimin
Gjallë e kam more Isë Boletinin