Hersiana Matmuja: “Besova Dhe Investova Në ëndrrën Time“

TEKSTESHQIP

Hersiana Matmuja

Hersiana Matmuja: “Besova Dhe Investova Në ëndrrën Time“

7-1-2014

Dalëngadalë ka nisë rrugën drejtë realitetit si fituesja e sivjetmë e festivalit të Radio Televizionit Shqiptar, ani pse po e mendon si një ëndërr. Hersiana Matmuja është këngëtarja që do të përfaqësojë Shqipërinë në festivalin e sivjetmë "Eurosong". E ndërsa po jeton me nderin e fitores, vajza 23 vjeçare nga Shqipëria ka mbledhur forcat për një përgatitje dhe përfaqësim sa më dinjitoz të vendit të saj në festivalin më të madh evropian, për çfarë është zotuar edhe përmes kësaj interviste dhënë Tribunës.

Hersiana Matmuja është vajza 23 vjeçare e cila ditë më parë u shpall fituese e edicionit të 52-të në "Festivalin e Këngës" në Radio Televizionin Shqiptar. Dhe bashkë me fitoren në këtë festival ajo ka prerë edhe biletën për ta përfaqësuar Shqipërinë për të njëmbëdhjetën herë në festivalin evropian të këngës "Eurovision" që do mbahet në maj të këtij viti në Kopenhagë të Danimarkës. Dhe derisa po përgatitet për pjesëmarrjen e saj dhe përfaqësimin e Shqipërisë sivjet, ajo për Tribuna ka rrëfyer emocionet që nga fitorja e deri tek synimet gjatë rrugëtimit të saj drejtë një fitoreje të mundshme.

Tribuna: Jeni një emër i ri i skenës muzikore. Cila është karriera juaj në muzikë?
Hersi: Ke të drejtë! Jam e re sepse jam vetëm 23 – vjeçe, por kam filluar të merrem me muzikë që në moshën 8-vjeçare. Dhe që atëherë nuk jam ndalur. Kam qenë aktive në të gjitha aktivitetet kulturore për fëmijë si në Shqipëri ashtu edhe jashtë saj. Me dëshirën dhe pasionin për të hulumtuar e studiuar gjithmonë e më shumë artin e të kënduarit konkurrova në liceun artistik "Jordan Misja" në Tiranë duke dalë një ndër të parat me pikë dhe duke fituar njëkohësisht të drejtën për të studiuar. Ndërkohë krahas studimeve të muzikës klasike kam qenë aktive dhe në shumë aktivitete të muzikës së lehtë siç ishte talent show "Ethet e së premtes", e më pas në vitin 2006 mora pjesë për herë të parë në "Festivalin e Këngës" në RTSH me një kompozim të Frederik Ndocit orkestrim të Edison Misos duke fituar nga kategoria e te rinjve. Kështu nisi rruga ime në "Festivalin e Këngës".

bas festivalit të ’45 mbarova studimet në liceun artistik, studiova 1-vit në "Akademinë e Arteve të Bukura" e më pas udhëtova drejt Romës për të konkurruar për kanto në konservatorin "Santa Cecilia" ku studioj dhe sot në vitin e pestë. Krahas studimeve në Romë jam rikthyer në festivalin e ’49 me këngën "Me cilin rri ti dashuri" kompozimi/orkestrimi Gent Myftaraj, teksti Agron Tufa, në festivalin e ’50 me këngën "Aty ku më le" kompozimi Shpëtim Kushta , orkestrimi Sokol Marsi, teksti Agron tufa, në festivalin e ’51 me këngën "Kush ta dha këtë emër" kompozimi/orkestrimi Genti Lako, teksti Jorgo Papingji, ku u renditem në vendin e tretë.

Fillimisht doja eksperiencën

Tribuna: Ditë më parë ju jeni shpallur fituese e edicionit të 52-të në " Festivali e Këngës" në RTSH. Si po e shijoni fitoren ?
Hersi: Kanë qenë ditë shumë të ngarkuara emocionalisht sepse për mua ky çmim ishte kurorëzimi i të gjitha vështirësive, përpjekjeve, studimit, zhgënjimit, gëzimit që kam kaluar deri më sot. Por ky çmim ishte një arritje për rifilluar nga fillimi.

Tribuna: Kur vendosët për të marr pjesë në "Festivalin e këngës" a keni menduar për fitore?
Hersi: Pjesëmarrjet e para në "Festivalin e Këngës" ishin të rëndësishme për të krijuar eksperiencën. E kam kërkuar shpesh skenën e festivalit që të krijoja përvojën e nevojshme për të pretenduar diçka më shumë.

Tribuna: Dihet se tashmë me fitoren në "Festivalin e Këngës", keni fituar edhe të drejtën për të përfaqësuar Shqipërinë në festivalin evropian të këngës "Eurovision". Çka do të thotë për ju kjo?
Hersi: Përgjegjësi, nder, kënaqësi dhe eksperience UNIKE!

Tribuna: Cili është mesazhi i këngës "Zemërimi i një nate" me të cilin ke fituar festivalin e 52-të?
Hersi: "Zemërimi i një nate" përmban një mesazh social me të cilin ndeshemi përditë me të. Zemërimi trajtohet si ndjenja e cila shkatërron dhe infekton shpirtin dhe marrëdhëniet njerëzore. Siç e shpjegon dhe profesor Jorgo Papingji, teksti është frymëzuar nga një aforizëm "Mëngjesi është më i zgjuar se mbrëmja " përkthyer në kënge "Çdo mëngjes është më i zgjuar se çdo mbrëmje". Sipas meje kjo është fraza që shpjegon dhe jep mesazhin e këngës.

Tribuna: A mendoni ta promovoni këngën përfaqësuese edhe në Kosovë?
Hersi: Patjetër që po. Me shumë dëshirë dhe kënaqësi uroj që të pritet mirë dhe në Kosovë.

Tribuna: Cilat janë pritshmëritë tuaja nga festivali evropian?
Hersi: Mundohem gjithmonë të mos krijoj shumë pritshmëri, por të përqendrohem e të jap maksimumin tim tek kënga.

Tribuna: Kur pritet të dalë versioni final dhe klipi i këngës "Zemërimi i një nate" ?
Hersi: Si u shpjegova dhe më parë. Akoma nuk kemi vendosur mbi detajet. Sapo kënga të jetë gati do t’iu lajmërojmë me shumë kënaqësi.

Tribuna: Çfarë mendoni për përfaqësimet e Shqipërisë në "Eurovision" deri më tani ?
Hersi: Kanë qenë të gjitha përfaqësime të veçanta, të ndryshme dhe shumë dinjitoze.

Tribuna: A e ndjeni përkrahjen nga shqiptarët, pasi zakonisht kënga fituese e festivalit ne RTSH përcillet shpesh me shumë polemika dhe pakënaqësi?
Hersi: Duke qenë që shijet janë objektive edhe pëlqimet kanë qenë të tilla. Mendimi është i lirë.

Tribuna: Cilat janë planet tuaja në të ardhmen?
Hersi: Të përfaqësoj sa më denjësisht vendin tim në festivalin evropian, dhe të mbaroj studimet e mia për kanto në konservatorin në Romë.

Tribuna: Dhe krejt në fund cili është mesazhi për lexuesit e gazetës Tribuna?
Hersi: Besova dhe investova në ëndrrën time dhe mu realizua. Besoni gjithmonë në ëndrrat dhe punën tuaj sepse nuk do t’iu zhgënjejnë kurrë. Të falënderoj shumë për këtë intervistë të bukur. Me respekt Hersi Matmuja!

Hersiana Matmuja

Zemërimi I Një Nate

[Teksti dhe Klipi]

(Albert Limani)

MË SHUMË LAJME

Komente 0