Muzika e këngës vjen si kompozim nga Kledi Bahiti, ndërsa tekstin e shkroi Rozana Radi. Ky material serviret tanimë i punuar edhe me klip muzikor, për video produksionin e të cilit u përkujdes Daniel Marku. Videoklipi u transmetua më 11 Dhjetor 2024. Një vokal i fuqishëm, si ai i Saretës, me siguri ju solli revoltë dhe nostalgji në zemër. Shumë do e gjejnë veten në këtë këngë. Sareta Bega: "Kënga Magjike ishte një nga synimet dhe ëndërra ime. Jam e lumtur që dhashë maksimumin e gjithë asaj që unë ndjeva brenda vetes për këte poezi, tekst të mrekullueshëm që më fale Rozana Radi dhe kjo muzikë po aq e fortë në të njejtën kohë në mënyrë “beteje” me krijimin e çdo note plot ndjenjë të sjellë nga Kledi Bahiti. Pa ju, kjo arritje nuk do të kishte të njejtin kuptim. Faleminderit nga zemra punës suaj. Shpresoj se e kam transmetuar sadopak tek të gjithë atë çka unë ndjeva tek vetja. Faleminderit çdokujt nga zemra për çdo vlerësim, koment, dashuri që vazhdoj të marr. Është emocion i papërshkrushëm të jesh e vlerësuar për atë çka ti ke punuar fort dhe fal".

E dashur Sareta e vogël,

Shikoj pas dhe të shoh ty, atë vajzën që ëndërronte me sy hapur, me zemrën të madhe dhe shpirtin që digjej nga dëshirat.

Të kujtoj si atë vajzën që ëndërronte, por që ndonjëherë kishte frikë t'i besohej vetes.

Të kujtoj shpesh, Sareta e vogël, si ndiheshe humbur, si të dukej bota aq e madhe, por ti nuk e ndale kurrë besimin. Dhe tani, shiko ku je. Çdo hap, çdo sakrificë, çdo emocion që ke përjetuar, të ka mësuar mos të ndalesh. Me karakterin tënd të fortë, por edhe me atë butësi të brishtë që të bën të veçantë, ke kaluar çdo vështirësi.
Dhe këtë mund ta thosha me siguri: ti po fiton çdo ditë, edhe kur nuk e shohim.

Por kjo rrugë ende nuk ka mbaruar, dhe di që ende ka shumë për të bërë.
Ky është vetëm fillimi, Sareta. Ndaj, mos e ndal, sepse ky është vetëm një hap i vogël në rrugën e madhe që po ndjek. Ti ke fituar shumë, por ajo që ke mësuar më shumë është se forcën e vërtetë e ke brenda vetes dhe ajo është ajo që do të të çojë drejt ëndrrave të tua, drejt jetës që meriton.

Një ditë, do të kthehesh dhe do të shohësh se çfarë ke arritur dhe do të ndihesh krenare për atë që je bërë. Por tani, vazhdo, me guxim, me zemër të madhe, sepse e di që do të arrish shumë më shumë.

Të përqafoj fort, Sareta, vajzën që ishe dhe gruan që je bërë.

Me dashuri
Vetja jote.