Unë jam yll me të vërtetë,
unë jam nur i kësaj bote,
dhe në rroj në këtë jetë,
rroj nga dashuria jote.

Qenke yll me të vërtetë,
zjarr i ndjenjave të mia,
dhe në vdeksha ndonjëherë,
do të vdes nga dashuria.

S’jam në pranga, në zinxhirë,
por pas teje jam i lidhur,
pasi puth buzët e tua,
mjalti më duket i hidhur.

Qenke nur me të vërtetë,
qenke nur i kësaj bote,
e në rroj në këtë jetë,
rroj nga dashuria jote.

Nga syri që ndez ylberë,
fluturuan mend e mia,
dhe në vdeksha ndonjëherë,
do të vdes nga dashuria.

Ti je zogu, ti je qielli,
ti je rrezja, ti je dielli,
ti je ëndrra, ti je jeta,
ti je shpresa, e vërteta.

Zog o zog që fluturove,
po ku ike, po ku shkove?!
Mos u lodh në shtegëtime,
se pa ndarje s’ka takime…