X Factor Albania 3

---

Nata finale e edicionit të 3-të të spektaklit X Factor Albania 3, përveç garës solli edhe shumë surpriza ndër të cilat ishin performancat e të ftuarave speciale Elhaida Dani & Miriam Cani.

Ergi Dini është shpallur fituesi i këtij edicioni të X Factor. Në 3-shen e më të mirëve u rradhit e 3-ta Sarah, konkurentja nga Italia, për të mbetur më pas mes konkurrencës së fortë mes dy djemve si Ergi Dini & Senad Rrahmani. Me shumicë votash nga publiku Ergi arriti të bëhej fituesi i X Factor Albania 3, duke bërë kështu fituese për herë të dytë mentoren e tij Tunën.

Ky event, i drejtuar për të tretin vit me radhë nga Alketa Vejsiu, me regji të Vera Grabocka, kishte si anëtarë jurie Pandi Laço (gazetar, prezantues, skenarist e tekstshkrues) Soni Malaj (këngëtare) Altuna Sejdiu (Tuna, këgëtare) dhe Alban Skënderaj (këngëtar), njëherazi dhe trajnerë të konkurrentëve të ndarë në grupe.

Nata finale e X Faktor Albania 3 ishte menduar si një spektakël. Gjithçka nisi me performancën e tre finalistëve, të cilët fillimisht interpretuan një kolazh këngësh, në shoqërimin e trupës së baletit "Albi Nako dance".

Më pas, konkurrimi u hap nga Sarah Memmola, për të vijuar me Senad Rrahmanin dhe Ergi Dinin. Ky i fundit spikati gjatë gjithë netëve të X Factor 3 për vokalin e veçantë, por jo vetëm.

Tre finalistët kënduan nga një duet edhe me mentorët e tyre, ku Ergi Dini u duartrokit gjatë për interpretimin e këngës "Feniks" , e njohur ndryshe si "Zogu i Tunës", dhe ku spiktati në këtë performancë live edhe këngëtarja Tuna.

Në këtë talent show, ndër më të ndjekurit në Shqipëri, ishte e ftuar speciale Harri Lena, fituesja e edicionit të X-FACTOR-ALBANIA-2, e cila ka prezantoi për publikun këngën e saj më të re "Aeroplan", këngë kjo e mundësuar (financuar e prodhuar) nga produksioni I X-Factor-Albania. Më pas në skenë janë ftuar Elhaida Dani, fituese e edicionit të kaluar të Voice Itali dhe këngëtarja e njohur shqiptare, Miriam Cani. Në spektakël u prezantuan edhe me një numër përshëndetës edhe konkurrentët dhe finalistët e X Factor, nga edicioni i parë tek ai aktuali, së bashku me prezantuesen e eventit, Alketa Vejsiu.

Përmes një video mesazhi, X Factor Albania 3 është përshëndetur edhe nga Simon Cowell, autori i X Factor, prodhues, sipërmarrës e zbulues talentesh, i njohur edhe si anëtari i jurisë së Pop Idol, talent show i pare britanik, nga ku kanë marrë patentën të gjitha Talent Show-t që zhvillohen në Europë, mes tyre dhe Shqipëria.

I gjithë ky spektakël është përmbyllur me shpalljen e fituesit, nga televotimi dhe juria, e cila shpalli si te tillë 18 vjeçarin nga Shkodra, Ergi Dini.